Chasa Editura Rumantscha
La Chasa Editura Rumantscha exista dapi l'entschatta 2010; ella è sustenida da la Pro Helvetia, dal Chantun Grischun e da la Lia Rumantscha.
Questa nova chasa editura porscha servetschs d'ediziun professiunals; sia finamira è da render pli vesaivla la pitschna, ma viscla scena da litteratura rumantscha.
Tut tenor ils manuscrits inoltrads edescha la Chasa Editura Rumantscha publicaziuns en ils idioms da scrittira ed en rumantsch grischun.Igl è previs d'edir novas publicaziuns litteraras, antologias e reediziuns da classichers na betg pli cuntanschibels.
La structura da la nova chasa editura è simpla. Ella consista en l'essenzial d'ina manadra da fatschenta, Anita Decurtins-Capaul, ed in cussegl consultativ da tschintg persunas, che sa cumpona actualmain da Roman Caviezel, Renata Coray, Esther Krättli (delegada dal Chantun Grischun), Clà Riatsch ed Anita Simeon.